Сёлетні рэгулярны сезон НХЛ завяршыўся, і мы падводзім вынікі для беларускіх хакеістаў. У сезоне 2024/25 у галоўнай лізе свету сыгралі сямёра беларусаў, але толькі адзін з іх працягне змаганне за Кубак Стэнлі.

🔹 Аляксей Протас (Вашынгтон) – 76 матчаў, 30+36=66 ачкоў, 18 хвілін штрафу, карыснасць +40.
Протас правёў найлепшы сезон у кар’еры і стаў адным з лідараў «Кэпіталз». Яго паважаюць у камандзе, а ягоны ўнёсак у агульны поспех неаспрэчны. Вашынгтон фінішаваў на першым месцы ў Метрапалітэн-дзівізіёне з 111 ачкамі. Калі б не траўма Аляксея і рэзкае падзенне вынікаў каманды без яго, «Кэпіталз» цалкам маглі б заваяваць Кубак Прэзідэнта. Таму вяртанне Протаса да гульні мае ключавое значэнне перад плэй-оф. У першым раўндзе яны згуляюць супраць «Манрэаля».

🔹 Ягор Шаранговіч (Калгары) – 73 матчы, 17+15=32 ачкі, 8 хвілін штрафу, карыснасць -9. Шаранговіч правёў няпросты сезон. Быў перыяд, калі яго адправілі ў фарм-клуб для аднаўлення формы. І хоць пасля вяртання ён палепшыў сваю гульню, гэтага не хапіла для выхаду ў плэй-оф. «Калгары» фінішавала з аднолькавай колькасцю ачкоў з «Сент-Луісам», але саступіла 8-е месца па дадатковых паказчыках. У наступным сезоне Шаркі трэба будзе сур’ёзна падняць узровень гульні, каб аднавіць давер трэнерскага штаба і стаць надзейным нападнікам. Быць адпраўленым у фарм-клуб – трывожны сігнал.

🔹 Арцём Леўшуноў (Чыкага) – 18 матчаў, 0+6=6 ачкоў, 8 хвілін штрафу, карыснасць -13.
Леўшуноў, які быў выбраны пад другім нумарам на драфце 2024 – найлепшы вынік у гісторыі беларускага хакея, добра заявіў пра сябе як 19-гадовы дэбютант. Шэсць выніковых перадач у 18 матчах для абаронцы – неблагі старт. У наступным сезоне Арцём павінен стаць больш актыўным на чужой сіняй лініі і яшчэ больш дапамагчы сваёй камандзе ў нападзе.

🔹 Уладзіслаў Калячонак: – Юта – 23 матчы, 2+3=5 ачкоў, 2 хвіліны штрафу, карыснасць -7; – Пітсбург – 12 матчаў, 0+2=2 ачкі, 8 хвілін штрафу, карыснасць -5
Калячонак меў магчымасць паказаць сябе ў дзвюх камандах. І хоць «Пінгвіны» афіцыйна не называюць гэта «перабудовай», зараз у клубе адкрываецца новы этап, дзе маладыя гульцы, як Уладзіслаў, могуць рэальна замацавацца ў асноўным складзе. Каб гэта зрабіць, яму трэба падцягнуць гульню і навучыцца як мага больш у такіх майстроў, як Карлсан і Летэнг. Канкурэнцыя вялікая, трэба штодзённа даказваць сваю каштоўнасць.

🔹 Аляксей Коласаў (Філадэльфія) –Філадэльфія Флайерз – 17 матчаў, сярэдняя колькасць прапушчаных – 3,59, % адбіткаў – 86,7 – Ліхай Вэлі Фантомз – 12 матчаў, сярэдняя колькасць прапушчаных – 3,11, % адбіткаў – 88,4
Коласаў, хутчэй за ўсё, не будзе гуляць у НХЛ у наступным сезоне. Два матчы напрыканцы сезону не пераканалі кіраўніцтва «Флайерз», што ён гатовы да гульні на высокім узроўні.

🔹 Мікіта Талапіла (Ванкувер) – 2 матчы, 1 перамога, 1 параза, 2,15 прапушчаных у сярэднім, 88,5% адбіткаў.
Талапіла атрымаў шанец у канцы сезону, калі «Кэнакс» вырашылі даць адпачыць асноўным галкіперам перад плэй-оф. І хоць яго паказчыкі не ўражваюць, для дэбюту гэта прыстойны вынік. Перамога ў дэбюце таксама выглядае сур’ёзна. Будзем сачыць за яго далейшым развіццём. 

🔹 Ілля Салаўёў (Калгары): – НХЛ – 5 матчаў, 0+1=1 ачко, 2 хвіліны штрафу, карыснасць -3 – АХЛ (Калгары Pэнглерз) – 57 матчаў, 6+21=27 ачкоў, 32 хвіліны штрафу, карыснасць +8
Салаўёў большасць сезону правёў у АХЛ, але атрымаў некалькі шанцаў паказаць сябе на ўзроўні НХЛ. Для абаронцы з добрай фізікай і бачанням поля – гэта добры знак. Калі працягне развівацца, цалкам можа заваяваць месца ў асноўным складзе ў наступным сезоне.

З сямі беларусаў, якія згулялі ў сезоне, толькі Аляксей Протас будзе прадстаўляць нашу краіну ў плэй-оф. Усе астатнія завяршылі выступы. Таму будзем пільна сачыць за «Кэпіталз» – менавіта яны цяпер галоўная “беларуская” каманда ў Кубку Стэнлі.